Maşının nömrəsini saxtalaşdıran sürücü cərimələrdən yayınır: DF-ni DE edib - DİN-ə ŞİKAYƏT - FOTO

Qayda pozmadığı halda cərimələnən sürücü redaksiyamızın qaynar xəttinə müraciət ünvanlayıb. Avtosfer.az-a məlumat verən Əhəd Məmmədov adlı sürücü bildirir ki, ona məxsus 77-DE-821 qeydiyyat nişanlı "KIA" markalı avtomobillə qayda pozmadığı halda barəsində elektron qərarlar tərtib olunub: "Avqustun 6-da cərimələnməyimlə bağlı telefonuma 2 sms daxil oldu. Elektron kabinetdə fotolara baxan zaman məlum oldu ki, qaydanı pozan başqa sürücüdür. Sadəcə həmin sürücü nömrəni saxtalaşdırıb. 77-DF-821 qeydiyyat nişanlı "GAC" markalı avtomobilin sürücüsü "F" hərfinin aşağı hissəsinə qara lent yapışdıraraq "E" hərfi edib. Nömrəni eyniləşdirən sürücü qayda pozaraq cərimələrdən bu formada yayınmağa başlayıb".

Ə.Məmmədov bildirir ki, bir müddət əvvəl də qayda pozmadığı halda bu cür cərimələnib: "Bir neçə ay əvvəl qayda pozmadığım halda cərimə yazılmışdı, sadəcə həmin vaxt bunun necə baş verdiyini anlamadım. Həmin vaxt Gəncə şəhər Polis İdarəsində məsələni aydınlaşdıran zaman polis əməkdaşları bildirdilər ki, cəriməni ödəyib sonra şikayət etmək lazımdır. Mən cəriməni ödədikdən sonra rəsmi qaydada şikayət etdim. Bundan sonra qayda pozmadığım öz təsdiqini tapdığı üçün cərimə məbləği geri qaytarıldı" - deyə Əhəd Məmmədov bildirib.

O, baş verən hadisə ilə bağlı Daxili İşlər Nazirliyinə rəsmi qaydada müraciət ünvanlayıb. Məsələnin kökündən həll edilməsini xahiş edən oxucu, həmin sürücünün ciddi şəkildə cəzalandırılmasını xahiş edir.

Fərid