“Modern məktəb”in önündə xaos: Sürücülər hər gün tıxacda qalır - VİDEO

Paytaxtın Nərimanov rayonu Əliyar Əliyev küçəsində günün müxtəlif saatlarında sıxlıq müşahidə olunur.
Məsələylə bağlı izləyicimiz Avtosfer.az-a videomaterial göndərib. Belə ki, yolun hərəkət hissəsində park edilmiş nəqliyyat vasitələri tıxac yaradır. Şikayətçinin iddiasına görə, xoşagəlməz mənzərəyə səbəb ərazidə yerləşən Bakı Modern Təhsil Kompleksindən (BMTK) qaynaqlanır. O bildirib ki, övladlarını məktəbə gətirən valideynlər adətən avtomobillərini təhsil kompleksinin önündə saxlayır. Nəticədə yolu zəbt edən nəqliyyat vasitələri maşınların hərəkətinə əngəl törədir və sürücülər dəqiqələrlə tıxacda gözləməli olurlar. İzləyici, həmçinin səhər saatlarındakı sıxlığın axşam da təkrarlandığını əlavə edib. 
Ümid edirik ki, sürücülərin haqlı narazılığına səbəb olan bu görüntüylə bağlı aidiyyəti qurum tez zamanda tədbir görəcək.
Xatırladaq ki, dayanma-durma qaydalarını pozan sürücülər İnzibati Xətalar Məcəlləsinin 346.1-ci maddəsinə əsasən 20 manat ödəmək məcburiyyətindədir.

Nərmin