Özlərini hamıdan üstün hesab edən sürücülər yolda tıxacı belə yaradırlar - VİDEO

Bakıda qayda pozub həm təhlükə, həm də  tıxac yaradan sürücülərin videosu sosial şəbəkədə yayılıb. Avtosfer.az xəbər verir ki, oktyabrın 9-da, paytaxtın Babək prospektində geriyə dönmək istəyən sürücülər sıxlıqda qalmamaq üçün qayda pozuntusu ediblər. Belə ki, 77-DV-301 qeydiyyat nişanlı “Toyota Prius” markalı, 99-SY-072 qeydiyyat nişanlı “Hyundai” markalı, 10-EY-754 qeydiyyat nişanlı “Toyota” markalı avtomobillərin sürücüləri, geriyə dönmə zolağında sıxlıq olduğunu görərək düzünə hərəkət təşkil edilmiş zolaqdan manevr etməyə çalışıblar. Bu zaman həm arxadan gələn, həm də sol zolaqda hərəkət edən nəqliyyat vasitələrinə maneə yaradıblar.

Qeyd edək ki, yollarda tıxacların yaranmasına səbəb bu cür sürücülərdir. Adətən sola və ya sağa dönmə zolaqlarında sıxlıq yaranan zaman, özünü hamıdan üstün hesab edən belə sürücülər qonşu zolaqlardan manevr edərək yolda tıxacın ağırlaşmasına gətirib çıxarırlar. 5-10 sürücünün atdığı səhv adddım, yüzlərlə sürücünün narahatlığına, gedəcəyi ünvana gec çatmasına səbəb olur. Ona görə də hər bir sürücü özündən əvvəl kənardakı insanları düşünməlidir. Bu zaman hər kəsin rahat və təhlükəsiz hərəkəti təmin ediləcək.

Nərminə Əli