Özünüzü bu sürücüdən qoruyun: Telefonla cərimə yazır - VİDEO

Bakıda dayanma-durma qaydasını pozan sürücü qanunsuz şəkildə cərimələnməsi ilə bağlı sosial şəbəkədə paylaşım edib. Avtosfer.az xəbər verir ki, Tural İbrahimov adlı sürücü idarə etdiyi avtomobillə paytaxtın Süleyman Sani Axundov küçəsində park edən zaman, onun arxasında dayanan 90-ZE-014 qeydiyyat nişanlı "Opel" markalı avtomobilin sürücüsü telefonla fotolar qeydə alaraq ərazidən uzaqlaşıb. Sürücü bu formada cərimənin yazılmasından narazıdır.

Qeyd edək ki, dayanma-durma qaydasını pozan sürücü nəqliyyat vasitəsinin yanındadırsa, polis əməkdaşı sürücüyə yaxınlaşaraq adi qaydada protokol tərtib etməlidir. Əgər sürücü nəqliyyat vasitəsinin yanında deyilsə, o zaman sürücünün iştirakı olmadan foto və ya video çəkiliş aparılmaqla, nəqliyyat vasitəsinin istifadəçisi barədə inzibati tənbeh vermə haqqında qərar çıxarılır. İnzibati xəta hadisəsinin baş verdiyini və hansı nəqliyyat vasitəsinin sürücüsü tərəfindən törədildiyini sübut edən foto və ya video materiallar əlavə olunmaqla, həmin qərarın surəti nəqliyyat vasitəsinin ön şüşəsinə qoyulur. İnzibati tənbeh vermə haqqında qərar operativ nəqliyyat vasitəsində quraşdırılmış bort-kompüter vasitəsilə tərtib olunaraq dərhal müvafiq icra hakimiyyəti orqanının müəyyən etdiyi müvafiq informasiya sistemində yerləşdirilir.

Qeydə alınan videogörüntüdəki kimi mülki formada foto və ya video çəkiliş apararaq sonradan müxtəlif üsullarla elektron qərar tərtib etmək qanunla qadağandır.

Fərid