Piyadaya heç bir maneə törətməyən sürücü CƏRİMƏLƏNDİ - ŞİKAYƏT - FOTO

Bərdə rayonunda qayda pozmayan sürücü kamera vasitəsilə cərimələnib. Bu barədə sürücü Avtosfer.az-ın qaynar xəttinə müraciət ünvanlayıb. Sənan İbrahimov adlı oxucu bildirib ki, idarə etdiyi 90-GF-767 qeydiyyat nişanlı "Honda" markalı avtomobillə hərəkətdə olarkən onun barəsində protokol tərtib olunub: "Piyada keçidində heç kimə mane olmayaraq yoluma davam etmişəm. Görüntüdən də aydın şəkildə görünür ki, piyada yolun əks tərəfindən yenicə hərəkət etməyə başlayıb. Mən öz hərəkətimlə ona heç bir maneə törətməmişən. Ona görə də kamera vasitəsilə barəmdə tərtib edilmiş cərimə əsassızdır. Bu barədə Asanpay.az vasitəsilə müraciət də ünvanlamışam. Lakin hələ heç bir reaksiya verilməyib- deyə sürücü bildirib.

2016-cı ildə İnzibati Xətalar Məcəlləsinə edilmiş dəyişiklikdən sonra 330-cu maddəyə "Qeyd" hissəsi əlavə edildi. Həmin qeyddə yazılıb ki, piyadaya "yol verilməməsi" dedikdə sürücünün hərəkəti davam etdirməsi və ya yenidən hərəkətə başlaması, yaxud hər hansı manevr etməsi nəticəsində piyadanın hərəkət istiqamətini və ya sürətini dəyişdirməyə məcbur etməsi başa düşülür. Yəni, sürücü piyada keçidini keçərkən piyadanın hərəkət sürətinə və hərəkət istiqamətinə maneə yaratmırsa qayda pozmamış hesab olunur.

Fərid