Qanundan xəbərsiz sürücü maşının qarşısına keçib qəza şəraiti yaratdı - 10-CF-311 - VİDEO

Bakıda yol hərəkəti qaydasını pozan sürücü qəza şəraiti yaradıb. Avtosfer.az xəbər verir ki, hadisə oktyabrın 12-də, Kənar Dairəvi yolda baş verib.

Belə ki, 10-CF-311 qeydiyyat nişanlı "Toyota" markalı avtomobilin sürücüsü "Meyvəli" bazarı istiqamətindən həmin yola daxil olarkən qaydaları kobud şəkildə pozub. O, sürətlənmə zolağında sürəti artırmadan qəfil sol zolağa yerdəyişmə edib. Bu zaman yüksək sürətlə gələn avtomobilin qarşısına çıxaraq ona təhlükəli anlar yaşadıb.

Qeyd edək ki, sürücülərin əksəriyyəti sürətlənmə və tormozlama zolaqlarının nə olduğunu və bu zolaqlarda necə hərəkət etməli olduqlarından xəbərsizdirlər.

Qeyd edək ki, sürücü sürətlənmə zolağına daxil olduqdan sonra sürətini həmin zolaqda artıraraq digər zolağa yerdəyişmə etməlidir. Bu zaman manevr edəcəyi zolaqda olan nəqliyyat vasitələrinə heç bir təhlükə yaratmamalıdır.

Bu zolaqlardan düzgün istifadə etməyən sürücülər İnzibati Xətalar Məcəlləsinin 327.1-ci maddəsilə 40 manat məbləğində cərimə oluna bilərlər.

Könül Rauf