Qəzadan güclə xilas olan velosipedçi yenə qayda pozaraq yoluna davam etdi - VİDEO

Paytaxtın Nərimanov rayonu, Təbriz küçəsində qayda pozan velosipedçi avtomobilin kamerasına düşüb.

Avtosfer.az-ın məlumatına görə, hadisə noyabrın 26-da saat 22:06 radələrində qeydə alınıb. Kadrdan göründüyü kimi, əks istiqamətdə hərəkət edən velosipedçi qoşa xətti tapdalayaraq qarşı zolağa keçir. Daha sonra işıqforun qırmızı işığında dayanan avtomobillərin arasından keçən sürücü sağdan gələn maşına çırpılmaqdan son anda xilas olur. Bu zaman görüntünü qeydə alan sürücü siqnal verərək ona iradını bildirir. Velosipedçi isə əli ilə işarə edib qırmızı işığa məhəl qoymadan yolayrıcına daxil olur.

Qeyd edək ki, “Yol Hərəkəti Haqqında” Qanuna əsasən, velosipedçilər də ümumi yol hərəkəti qaydalarına tabe olan iştirakçı hesab olunurlar. Bu səbəbdən onlar işıqforun tələblərinə riayət etməli, əks istiqamətə çıxmamalı və qoşa xətti keçməməlidirlər.
 

Nərmin