Qırıq xətdə ötmə edən sürücü yazılmış cərimədən narazıdır; görün cərimə niyə yazılıb - VİDEO

Hacıqabul-Bəhramtəpə yolunda ötmə edən sürücü kamera vasitəsi ilə cərimə edilib. Bu barədə sürücü Tahir Abdullayev redaksiyamızın elektron ünvanına şikayət ünvanlayıb. O bildirir ki, idarə etdiyi 77-CK-729 qeydiyyat nişanlı "Honda" markalı avtomobillə qırıq xətdə ötmə edən zaman onun barəsində 3 bal 80 manat məbləğində elektron qərar qəbul edilib. Sürücü qırıq xətdə ötmə etdiyi üçün cərimənin qanunsuz yazıldığını iddia edir.

Lakin qərara əlavə edilmiş videodan aydın şəkildə görünür ki, sürücü ötmə edən zaman qarşıdan gələn avtomobilin üzərinə sürərək ona təhlükəli anlar yaşadıb. Bu səbəbdən də onun barəsində inzibati qərar qəbul edilib.

Bəzən sürücülər elə düşünür ki, qırıq xətdə istədiyi formada ötmə edə bilər. "Yol hərəkəti haqqında" qanunda qeyd olunub ki, ötməyə başlamazdan əvvəl sürücü əmin olmalıdır ki, girmək istədiyi hərəkət zolağı ötmə üçün kifayət edəcək məsafədə boşdur və bu manevr ilə o, qarşıdan gələn və bu zolaqda gedən nəqliyyat vasitələri üçün maneə yaratmayacaq.

Leyla