Qoşa xətti tapdalayıb sürücünün önünü kəsdi, üstəlik irada əsəbiləşdi - 90-BS-199 - VİDEO

Məhəmmədi-Kürdəxanı yolunda kobud qayda pozan sürücü avtomobilin kamerasına düşüb. 

Avtosfer.az-ın məlumatına görə, hadisə avqustun 13-də saat 16:44 radələrində qeydə alınıb. Belə ki, hərəkətdə olan 90-BS-199 dövlət nömrə nişanlı “Opel” markalı avtomobilin sürücüsü əks istiqamətli yola çıxıb və qoşa xətti tapdalaraq yenidən öz zolağına keçib. Bu vaxt o, görüntünü qeydə alan sürücüyə qəza şəraiti yaradıb. Kadrdan da göründüyü kimi, maşının önünə keçən sürücü tormoz verib və sürücüyə əliylə xoşagəlməz hərəkətlər edib. Daha sonra onlar mübahisə ediblər. Təhlükəylə üzləşən sürücü ona yaxınlaşaraq iradını bildirib. Sürücü isə törətdiyi xətaya haqq qazandırıb. 

Nərmin