“Range Rover”i keçiddə saxlayan qadın yaşlı piyadanın yolunu kəsdi - VİDEO

Paytaxtın Təbriz küçəsində yol hərəkəti qaydalarının kobud şəkildə pozulması qeydə alınıb.

Avtosfer.az-ın məlumatına görə, hadisə bir neçə gün əvvəl səhər saatlarında baş verib. Belə ki, 77-VB-877 dövlət nömrə nişanlı “Land Rover” markalı avtomobilin sürücüsü işıqforun sarı işığını nəzərə almayaraq hərəkətdə olduğu zolaqdan sağa manevr edib və piyada keçidinin üzərində dayanıb. Bu zaman yolu keçmək istəyən yaşlı qadının hərəkətinə maneə yaranıb. Görüntülərdən də aydın olur ki, piyada sürücünün bu davranışına etirazını bildirərək yoluna davam edir.

Qeyd edək ki, hadisə şahidi olan moto sürücü avtomobili idarə edən şəxsin qadın olduğu bildirib.

Xatırladaq ki, belə hallarda sürücülər piyada keçidinə yaxınlaşarkən sürəti azaltmalı, işıqforun tələbinə əməl etməli və keçiddə piyadalara tam üstünlük verməlidirlər. Xüsusilə yaşlılar və digər həssas yol hərəkəti iştirakçıları üçün bu cür məsuliyyətsiz davranış ciddi təhlükə yaradır. Unutmaq olmaz ki, yol hərəkəti qaydalarına riayət etmək təkcə cərimədən yayınmaq üçün deyil, insan həyatını qorumaq üçündür.

Nərmin