Sağ zolaqdakı maşını sıxışdırıb sürücünün səbrini tükətdi - 77-AN-166 - VİDEO

Bakının Yasamal rayonu, Həsən bəy Zərdabi küçəsində qayda pozan sürücü anbaan görüntülənib.

Avtosfer.az-ın məlumatına görə, hadisə iyunun 11-də saat 18:38 radələrində qeydə alınıb. Videodan da göründüyü kimi, 77-AN-166 dövlət nömrə nişanlı “Changan” markalı avtomobilin sürücüsü manevr qaydasını pozub. Belə ki, o, sağ zolaqda hərəkətdə olan maşına əhəmiyyət vermədən onu sıxışdırıb. Ardınca isə qayda pozan sürücü həmin zolağa keçərək görüntünü qeydə alan sürücüyə qəza şəraiti yaradıb. Təhlükəylə üzləşən sürücü “Niyə elə edirsən?” deyərək ona əsəbiləşib. 

Qeyd edək ki, sözügedən küçədə sağ zolaq yalnız sağa dönməyə icazə verir. Bəzi sürücülər qabağa düşmək üçün səhv zolaqla hərəkət edərək yolayıcına çatan vaxt videodakı sürücü kimi qayda pozurlar.  Belə situasiya ilə qarşılaşmamaq üçün öncədən düzgün zolaqda yerləşmək lazımdır. 

Nərmin