Sağa yandırıb sola dönən sürücü təhlükəli vəziyyət yaratdı - 77-ER-717 - VİDEO

Bakıda manevr qaydasını pozan sürücü təhlükə yaradıb. Avtosfer.az xəbər verir ki, hadisə dekabrın 6-da, paytaxtın Yusif Səfərov küçəsinin girişində qeydə alınıb.

Belə ki, 77-ER-717 qeydiyyat nişanlı "Audi"markalı avtomobilin sürücüsü Babək prospekti istiqamətinə getmək üçün sağa dönmə işığı yandırıb. Lakin zolaqlar üzrə düzgün hərəkət edə bilmədiyi üçün sol zolağa yerdəyişmə edib. Bu zaman həmin zolaqla hərəkət edən avtomobilin qarşısına çıxaraq ona qəza şəraiti yaradıb.

Yol hərəkəti qaydalarına görə, sürücülər zolaq dəyişərkən hərəkət istiqamətlərini düzgün müəyyən etməli, siqnal verməli və digər nəqliyyat vasitələrinin hərəkətinə mane olmamalıdırlar. Lakin bəzi sürücülər bu tələblərə əməl etməyərək, digər yol iştirakçıları üçün təhlükə yaradırlar. Belə hallar xüsusilə döngələrdə daha çox müşahidə edilir.

Döngə olan yollarda bəzi sürücülər zolaqları düzgün izləmək əvəzinə, sağa və ya sola kəsərək hərəkət edirlər. Bu, nəinki qayda pozuntusudur, həm də qəzalara gətirib çıxara biləcək təhlükəli bir vərdişdir. Yol hərəkəti iştirakçılarının təhlükəsizliyini təmin etmək üçün sürücülərin zolaqlar üzrə hərəkət etməsi vacib hesab olunur.

Fərid