Sakinlər binanın qarşısındakı yolu betonla bağlayıblar - ŞİKAYƏT - VİDEO

Sürücülük təlimçisi Arzu Babazadə Bakıda binanın həyətində yolun kəsilməsi ilə bağlı redaksiyamıza məlumat ünvanlayıb. Avtosfer.az xəbər verir ki, videogörüntü paytaxtın Süleyman Sani Axundov 415 ünvanında qeydə alınıb. Sakinlər binanın qarşısından keçən yolun ortasına beton sədlər qoyaraq avtomobillərin hərəkətini məhdudlaşdırıb. Arzu Babazadə bildirir ki, tıxac vaxtı alternativ yol kimi binanın qarşısından istifadə etmək istəyirsən, lakin gəlib bu beton maneələrlə üzləşirsən. O qeyd edib ki, həmin ərazidə digər binaların qarşısı da eyni vəziyyətdədir.

Qeyd edək ki, İnzibati Xətalar Məcəlləsinin 354.0.4-cü maddəsinə əsasən, yolların hərəkət hissəsində sədlərin, şlaqbaumların qurulmasına və nəqliyyat vasitələrinin hərəkətinin başqa üsullarla kəsilməsinə, yaxud nəqliyyat vasitələrinin və piyadaların hərəkətinə maneələr yaradılmasına görə, fiziki şəxslər səksən manatdan yüz manatadək məbləğdə, vəzifəli şəxslər dörd yüz manatdan beş yüz manatadək məbləğdə, hüquqi şəxslər üç min manatdan dörd min manatadək məbləğdə cərimə edilir.

Fərid