Sarı tor olmayan yolayrıcında sürücülərə cərimə yazıla bilər? - VİDEO

Son illər paytaxtda bir sıra yolayrıclarında sarı tor nişanlanması tətbiq olunmağa başlayıb. Avtosfer.az xəbər verir ki, bu nişanlanma xətləri yolayrıcının sərhədlərini göstərir və tıxac zamanı sürücülərin həmin hissəyə daxil olaraq orada dayanmasını qadağan edir.

Lakin bütün yolayrıclarında sarı tor tətbiq edilmədiyindən bəzi sürücülər hesab edirlər ki, sarı tor olmayan kəsişmələrdə tıxac zamanı yolayrıcına daxil olub dayanmaq olar.

"Yol hərəkəti haqqında" qanunda qeyd olunub ki, əgər yolayrıcında, o cümlədən yolun hərəkət hissələrinin kəsişmə yerində, yaxud yolayrıcından və ya kəsişmə yerindən bilavasitə sonra tıxac yaranıbsa və bu, sürücünü dayanmağa məcbur edərək digər istiqamətlərdən nəqliyyat vasitələrinin hərəkəti üçün maneə yaradacaqsa, sürücünün belə yolayrıcına və ya sarı torla işarələnmiş kəsişmə yerinə daxil olması qadağandır.

Qanunda açıq şəkildə göstərilir ki, bu qadağanın tətbiqi üçün sarı tor nişanlanmasının olması şərt deyil.

Yəni sarı tor olmayan yolayrıclarında və kəsişmə yerlərində də dayanıb yolu kəsmək qayda pozuntusu hesab olunur.

Bu qaydanı pozan sürücülər İnzibati Xətalar Məcəlləsinin 327.2-ci maddəsi ilə 3 bal 100 manat məbləğində cərimə oluna bilərlər.

Fərid