Şəkil və videogörüntü olmadan protokol tərtib edilməməlidir? - AÇIQLAMA

Bəzi hallarda yol polisi əməkdaşlarının videogörüntü və ya şəkil olmadan protokol tərtib etməsi sürücülər tərəfindən narazılığa səbəb olur. Belə ki, bu nüans bəzən sürücü və DYP əməkdaşları arasında münaqişə səbəbinə belə çevrilir. 

Bəs videogörüntü və yaxud şəkil olmadan protokolun tərtib edilməsi qanunidirmi?

Avtosfer.az xəbər verir ki, bu barədə nəqliyyat məsələləri üzrə ekspert Elməddin Muradlı Referans-a açıqlamasında bu problemlə bağlı danışıb.

“Yol hərəkəti” haqqında qanunun tələblərinə görə, bəzi xətalar var ki, onlar xüsusi texniki vasitələrlə - radar və kameralarla qeydə alınmalıdır və protokol da ona əsasən tərtib olunmalıdır. Lakin elə xətalar var ki, bunu yol polisi vizual şəkildə də aşkar edərək cərimə yaza bilər. Məsələn, yol polisinin dayandığı yerdə sürücü qoşa xəttin tələbini pozur, piyadaya yol vermir, qırmızı işıqda hərəkət edir, təhlükəsizlik kəmərini taxmayıb və yaxud da mobil telefonla danışır. Bunları yol polisi görürsə, aşkarlayıb cərimə yaza bilər. Bəzi sürücülər var ki, onlar məhz insident yaratmaq üçün polisdən görüntü tələb edərək səs-küy salmağa və özlərini haqlı çıxarmağa çalışırlar. Lakin hər cərimə görüntü ilə tətbiq olunmaq məcburiyyətində deyil”.

Ekspert qeyd edib ki, bu cür mübahisəli məsələlərdə qanunun tələbinə uyğun olaraq əsasən vətəndaşın xeyrinə qərar çıxarılsa da, vətəndaş nəzərə almalıdır ki, bu qaydalara əməl etmək onun öz təhlükəsizliyi üçün önəmlidir.

“Belə münaqişəli halların araşdırılmasın mən də iştirak etmişəm. Bəzi vətəndaşlar cərimədən boyun qaçırmaq məqsədilə polisə qarşı ağlasığmaz hərəkətlər edir, şərt atır. Onlar düşünürlər ki, qaydalara əməl etmirəmsə, öz həyatımı təhlükəyə atıram və buna heç kim qarışa bilməz. Lakin bu belə deyil, sürücü bilməlidir ki, hər əməl edilməyən qayda təkcə onun deyil, avtomobildə olan digər şəxslərin, həmçinin digər yol hərəkəti iştirakçılarının da həyatını təhlükəyə atır”.