Sol zolağı tutub inadkarlıq edən sürücü sonda əlini çıxarıb... - VİDEO

Qaydalara məhəl qoymadan hərəkət edən yük avtomobilinin sürücüsü ilə bağlı oxuculardan biri redaksiyamızın qaynar xəttinə şikayət ünvanlayıb. Avtosfer.az xəbər verir ki, hadisə aprelin 9-da, Bakı-Qazax yolunun Kürdəmir rayonundan keçən hissəsində qeydə alınıb.
Belə ki, 01-ZA-339 qeydiyyat nişanlı yük avtomobilinin sürücüsü sağ zolaq boş olduğu halda, sol zolaqla hərəkət edib. Arxadan gələn sürücü isə yol istəyən zaman, o, həmin zolaqda hərəkətinə davam edib. Sonda yol verməyə məcbur olan sürücü haqsız olduğu halda, əl hərəkətləri ilə narazılığını bildirib.
"Yol hərəkəti haqqında" Qanunun 49-cu maddəsində qeyd olunub ki, normal hərəkət zamanı nəqliyyat vasitələrinin sürücüləri vəziyyətdən asılı olaraq, yolun hərəkət hissəsinin sağ kənarı ilə hərəkət etməlidirlər. Yaşayış məntəqələrindən kənarda, habelə yaşayış məntəqələrində 5.1 və ya 5.3 nişanları ilə işarələnmiş yolun hərəkət hissəsində hərəkət istiqamətində sağ zolaq boş olduğu halda, sol zolaqlarla hərəkət etmək qadağandır.
Bu qaydanın pozulmasına görə sürücülər İnzibati Xətalar Məcəlləsinin 327.1-ci maddəsi ilə 40 manat məbləğində cərimə oluna bilərlər.

Fidan