Sürət “şou”su göstərən sürücünün vəsiqəsi əlindən alındı + HƏBS OLUNDU - VİDEO

Xaçmaz Rayon Polis Şöbəsinin Dövlət Yol Polisi Bölməsinin əməkdaşları tərəfindən ictimai asayişi nümayişkəranə şəkildə pozaraq avtoxuliqanlıq hərəkətləri edən şəxs müəyyən edilərək saxlanılıb.

DİN Mətbuat Xidmətinin Quba regional qrupundan Avtosfer.az-a bildirilib ki, hərəkət iştirakçılarının həyatına real təhlükə yaradan, eləcə də çəkdiyi görüntüləri sosial şəbəkələrdə paylaşan 20 yaşlı Vüsal Qədirovun barəsində protokol tərtib olunaraq aidiyyəti üzrə göndərilib.

Müvafiq qərarla V.Qədirov 15 sutka müddətinə inzibati qaydada həbs olunub və 1 il müddətinə sürücülük hüququ məhdudlaşdırılıb.

*** 5 noyabr, 17:00 

Xaçmazda yol hərəkəti qaydalarını kobud şəkildə pozan sürücü videolarını “TikTok” sosial platformasında paylaşıb.

Avtosfer.az-ın məlumatına görə, 99-DV-639 dövlət nömrə nişanlı “Nissan” markalı avtomobilin sürücüsü müxtəlif vaxtlarda qeydə alınmış görüntülərdə sürət həddini aşaraq həm özünü, həm də sərnişinləri təhlükəyə atıb. Hətta avtomobili yüksək sürətlə idarə edən sürücü qarşıdan gələn nəqliyyat vasitəsinə də qəza şəraiti yaradıb.

Digər görüntüdə onun avtomobilin damına və ön alın şüşüəsinə operativ nəqliyyat vasitələrinə məxsus göy və qırmızı sayrışan işıq siqnalları quraşdırdığı aydın şəkildə əks olunub.

Başqa bir videoda isə sürücü yol kənarından hərəkətə sərt şəkildə başlayıb və bu zaman təkərin yer səthində sürtünməsi səsləri çıxarıb. Eyni zamanda sürücünün 77-NP-714 dövlət nömrə nişanlı “Mercedes” markalı maşınla yarışdığı son kadrda əks olunub. 

Nərmin