Sürətlə yarışan sürücü “TikTok” paylaşımları ilə özünü ifşa etdi - 77-FO-285 - VİDEO

Paytaxt və ətraf ərazilərdə qayda pozan sürücü öz hərəkətini videoya çəkərək “TikTok” sosial şəbəkəsində paylaşıb.

Avtosfer.az-ın məlumatına görə, 77-FO-285 dövlət nömrə nişanlı “Renault Megane” markalı avtomobilin sürücüsü sürət həddini aşıb və yol boyu özüylə yanaşı digər hərəkət iştirakçıları üçün də təhlükə yaradıb. Kadrlarda sürücünün nəqliyyat vasitəsini yüksək sürətlə idarə etdiyi açıq şəkildə görünür. Mütəmadi olaraq sürət həddini aşan sürücünün yolda quraşdırılan radarların yerini yaxşı bildiyi ehtimal edilir.

Təəssüflə qeyd edək ki, son vaxtlar ölkə ərazisində qeydə alınan yol-nəqliyyat hadisələrinin əksəriyyəti məhz yüksək sürət səbəbindən baş verir. Sürət həddini aşmaq avtomobilin idarəolunmasını çətinləşdirir, qəza anında reaksiya vermə imkanını azaldır və zərbənin gücünü dəfələrlə artırır. Bu cür davranışlar həm sürücünün, həm də digər insanların həyatını təhlükə altına salır.

Ağır qəzaların baş verməməsi üçün sürücülər yollarda ehtiyatlı davranmalı, sürət həddinə ciddi şəkildə riayət etməli və sosial şəbəkələrdə təhlükəli sürücülük hallarını nümayiş etdirməkdən çəkinməlidirlər.

Nərmin