Sürücü maşını nasaz vəziyyətdə yolun ortasına atıb təhlükə yaratdı - VİDEO

Bakıda avtomobili nasaz vəziyyətdə olan sürücünün təhlükə saçan hərəkətləri kameraya düşüb. Avtosfer.az xəbər verir ki, hadisə paytaxtın Babək prospektində qeydə alınıb.

Belə ki, "Pegout" markalı avtomobilin sürücüsü yaranmış nasazlığa görə yolun sol tərəfində parklanma edib. Lakin nə qəza dayanma nişanını, nə də işıq siqnalını qoşub.

Avtomobilin nasaz olmasını bildirən sürücü çıxış yolunu kapotu açmaqda görüb. Lakin bu hərəkət inzibati məsuliyyət yaradır.

Qanunvericilikdə qeyd olunub ki, dayanmanın qadağan edildiyi yerdə nəqliyyat vasitəsi məcburi dayandıqda və ya hərəkət hissəsində onun olması yol hərəkətinin digər iştirakçılarına maneə yaradırsa, sürücü qəza dayanması işıq siqnalını yandırmalı və ya qəza dayanması nişanını quraşdırmalıdır.

Bu qaydalara əməl etməyən sürücülər dayanma-durma qaydasını pozmuş hesab edilirlər.

Fərid