Tıxaca səbri çatmayan sürücülər əks yola çıxıb kütləvi şəkildə qayda pozdular - VİDEO

Paytaxtın “8 Noyabr” prospektində kütləvi şəkildə qayda pozan sürücülər görüntülənib.

Avtosfer.az-ın məlumatına görə, hadisə sentybarın 25-də saat 09:11 radələrində qeydə alınıb. Belə ki, hərəkətdə olan 77-JF-142 dövlət nömrə nişanlı “Hyundai Staria” markalı, 99-XY-102 dövlət nömrə nişanlı “KIA Optima” markalı, “Honda” markalı, 77-BR-843 dövlət nömrə nişanlı “Hyundai İ30” markalı, 10-KS-420 dövlət nömrə nişanlı “Mercedes” markalı və “Toyota Aqua” markalı avtomobillərin sürücüləri sıxlıqda qalmamaq üçün əks istiqamətli yola çıxaraq axına qarşı hərəkət ediblər. Bir müddət sonra isə tıxacda gözləyən 77-CQ-025 dövlət nömrə nişanlı “Hyundai Elantra” markalı maşının sürücüsü də qarşı tərəfə keçərək hərəkətinə davam edib. Görüntüdən aydın olduğu kimi, prospektdə təmir işləri aparıldığı üçün yolda nişanlar çəkilməyib və bu vəziyyətdən əksər sürücülər sui-istifadə edirlər.

Xatırladaq ki, bu qayda pozuntusuna görə İnzibati Xətalar Məcəlləsinin 327.4-cü maddəsinə əsasən, 4 bal 150 manat cərimə nəzərdə tutulub.

Nərmin