Xaçmazda “Opel”lə riskli manevrlər edib “TikTok”da paylaşan sürücü qohumu ilə birgə saxlanıldı - VİDEO

Xaçmazda “Opel” markalı 38-BJ-780 nömrəli avtomobili sürücülük hüququ olmadan idarə edib avtoxuliqanlıq edən və görüntüləri sosial şəbəkələrdə yayan 16 yaşlı yeniyetmə polis tərəfindən saxlanılıb. DİN-Mətbuat Xidmətinin Quba regional qrupunun baş inspektoru, polis baş leytenantı Xəyal Talıbov Avtosfer.az-a bildirib ki, araşdırmalarla avtomobili ona qohumunun verdiyi məlum olub. Hər iki şəxs Polis Şöbəsinə dəvət olunub, profilaktik söhbət aparılıb və barələrində qanunamüvafiq tədbir görülüb.

***

Xaçmaz rayonu, Qusarçay kəndi ərazisində yol hərəkəti qaydalarını kobud şəkildə pozan sürücü videolarını sosial şəbəkə hesabında yayıb.

Avtosfer.az-ın məlumatına görə, 38-BJ-780 dövlət nömrə nişanlı “Opel” markalı avtomobilin sürücüsü “şou” göstərmək məqsədilə yolda təhlükəli manevrlər edib və bu görüntüləri qəsdən ictimailəşdirib. Videodan aydın olduğu kimi, o, bu zaman özüylə yanaşı, piyadalara da qəza şəraiti yaradıb. Kadrdan görünür ki, onlar qorxaraq geri çəkiliblər. 

Paylaşılan digər görüntülərdə isə sürücü avtomobilin konstruksiyasına müdaxilə edib və ayaqaltı hissəsinə göy rəngli işıqlar quraşdırıb.

Bundan başqa, o, maşın sürməyə yaşının çatmadığını və bu səbəbdən avtomobili sürücülük vəsiqəsi olmadan idarə etdiyini videoda bildirib. 

Nərmin