Yolu necə gəldi keçən piyada maşına çırpıldı, sürücü ilə mübahisə etdi - ANBAAN VİDEO

Dəfələrlə xəbərdarlıq edilməsinə, eləcə də cərimələrə baxmayaraq bəzi piyadalar hələ də keçidlərdən istifadə etmirlər və özlərini haqlı sayırlar.

Avtosfer.az xəbər verir ki, növbəti belə  hadisə “Koroğlu” Nəqliyyat Mübadilə Mərkəzinin yaxınlığında baş verib. Təlimçi Arzu Babazadənin göndərdiyi görüntülərdən aydın olur ki, 4-cü uzununa küçəsində piyada təyin olunmamış yerdən keçir və soldan gələn maşına əhəmiyyət vermədən onun qarşısına çıxır.

Sürücü diqqətli olub sürəti azaltmasaydı ağır qəza baş verə bilərdi. Sürücü peşəkarlığı sayəsində qəzanın qarşısını alsa da, piyada geriyə dönərək sürücü ilə mübahisə etmək istəyib. Hadisə yerində olan şəxslər araya girərək mübahisənin böyüməsinin qarşısını alıblar.

Mütəxəssislər bildirir ki, piyada zolağından kənar yerdən yolu keçmək ciddi təhlükə yaradır və həm sürücülər, həm də piyadalar üçün risk faktorudur. Bu cür halların qarşısını almaq üçün ictimai maarifləndirmə və qaydaların tətbiqi zəruridir.

Eltac Zülfüqaroğlu