Yolunu qısaldan sürücü eyni anda iki kobud qayda pozdu - VİDEO

Bakıda yol hərəkəti qaydalarını kobud şəkildə pozan sürücünün hərəkətləri kameraya düşüb. Avtosfer.az xəbər verir ki, hadisə oktyabrın 18-də, paytaxtın Abdulla Şaiq küçəsində baş verib.

Belə ki, 99-TH-212 qeydiyyat nişanlı "Toyota" markalı avtomobilin sürücüsü Fuad İbrahimbəyov küçəsindən Abdulla Şaiq küçəsinə doğru getmək üçün geriyə hərəkət edib. Sonra isə pandusdan səkiyə çıxaraq qaydaları kobud şəkildə pozub.

Qeyd edək ki, Fuad İbrahimbəyov küçəsindən Abdulla Şaiq küçəsinə çıxış üçün 300 metr qarşıda geriyə dönmə yeri var. Sürücü yolunu qısaltmaq üçün eyni anda iki kobud hərəkətə yol verib. Yəni, həm geriyə hərəkət manevri qaydasını pozub, həm də səkidə hərəkət edib.

Qeyd edək ki, bu qayda pozuntularına görə, İnzibati Xətalar Məcəlləsinin 327.1-ci maddəsilə 40 manat məbləğində cərimə nəzərdə tutulub.

Fərid