Yük maşınını 2-ci zolaqda saxlayıb hərəkətə mane oldu – 99-JO-119 - VİDEO

Paytaxtdakı bəzi sürücülərin qaydaları gözardı edərək bir-birlərinə, eləcə də piyadalara çətinlik yaratması ilə bağlı dəfələrlə xəbərlər dərc etmişik. Lakin qeyd edilən problem sadəcə Bakıda deyil, bölgələrdə də qeydə alınır.

Avtosfer.az xəbər verir ki, Sumqayıt şəhəri 45-ci məhəllədəki göz klinikasının qarşısında sürücü yük maşınından düşərək ərazidən uzaqlaşıb.

Belə ki, şəhərin məşhur “14 mərtəbə” adlanan binasının yanında, Nəriman Nərimanov küçəsində 99-JO-119 qeydiyyat nişanlı “ISUZU” markalı yük avtomobilinin sürücüsü məcburi dayanma işıqlarını yandırıb və maşından düşüb. 2-ci zolaqda nəqliyyat vasitəsini saxlamaqla, həm yolun kənarında parklayan avtomobillərin parklama yerindən çıxmasına, həm də digər nəqliyyat vasitələrinin hərəkətinə mane olub.

Qeyd edək ki, qaydaları bu cür pozan sürücülər İnzibati Xətalar Məcəlləsinin 346.4-cü maddəsinə əsasən 80 manat və 2 balla cərimələnir.

Səfər