ABŞ-da yüngül mühərrikli təyyarə qəzaya uğradı

ABŞ-ın Miçiqan ştatı, Bat Taun şəhərində yüngül mühərrikli təyyarə qəzaya uğrayıb. Hadisə nəticəsində təyyarədə olan hər üç sərnişin dünyasını dəyişib.

Avtosfer.az xəbər verir ki, qəza Clark Road və Peacock Road kəsişməsində, saat 17:00 radələrində baş verib. Hadisə yerində sərnişinlərin şəxsiyyəti hələlik müəyyən edilməyib.

Yerli medianın yayımladığı fotolarda təyyarənin düşdüyü sıx meşəlik ərazidən güclü tüstü və yanğının yüksəldiyi əks olunub.

Şəhər rəsmiləri bildiriblər ki, qəzanın səbəbləri hələlik məlum deyil və Federal Aviasiya Administrasiyasının (FAA) nümayəndələri araşdırmaya dəstək üçün hadisə yerindədir.

Bat Taun şəhərinin 2020-ci il siyahıyaalınmasına görə cəmi 2,841 nəfər əhalisi var. Qəza ilə bağlı yollar bağlandığı üçün sakinlər və sürücülər təhlükəsizlik məqsədilə qəza yerindən uzaq durmağa çağırılıb.