Avtobusla yük maşını toqquşdu – 20 yaralı

Fransada avtobusla yük maşını arasında baş verən toqquşma nəticəsində ən azı 20 nəfər müxtəlif ağırlıq dərəcəli zədə alıb. Avtosfer.az-ın salamnews-a istinadən xəbərinə görə, hadisə bu səhər Qravlin (Nor departamenti, Fransanın şimal regionu) şəhərindəki A16 avtomobil yolunda baş verib. Təsdiqini tapmayan məlumatlara əsasən, avtobus turistik səyahətə çıxmış məktəbliləri daşıyırmış. Nəqliyyat vasitəsində ümumilikdə 51 nəfər olub, onlardan 45-i uşaq və yeniyetmələrdir. Avtobusun sürücüsü ağır vəziyyətdədir. Ondan başqa, 16 yeniyetmə və onları müşayiət edən yetkinlik yaşına çatmış 3 nəfər zərər çəkib. Yaralı sürücü vertolyotla yaxınlıqda yerləşən hospitala çatdırılıb. Yol-nəqliyyat hadisəsi avtobusun qarşısı ilə hərəkət edən Polşa nömrəli yük maşınının əyləci kəskin şəkildə basması nəticəsində baş verib. Polisin məlumatında avtobusun Fransaya Niderlanddan gəldiyi bildirilir.