Avtomobil kanala aşdı, sürücünün ayağı sındı - FOTO - YENİLƏNİB

Bərdədə idarəetmədən çıxan avtomobil kanala düşüb.

Avtosfer.az qafqazinfo-ya istinadən xəbər verir ki, 2000-ci il təvəllüdlü Elgün İntiqam oğlu Mustafazadənin sürdüyü “VAZ 2106” markalı avtomobil hərəkətdə olarkən idarəetmədən çıxıb.

Nəticədə avtomobil yol kənarındakı kanala düşüb. Sürücü E.Mustafazadənin ayağı sınıb.

Hadisə yerinə FHN-in Bərdə yanğınsöndürən bölməsinin xilasediciləri gələrək sürücünü çıxarıb aidiyyəti üzrə təhvil veriblər.

Avtomobilin kanaldan çıxarılması üçün iş aparılır.

***

TƏBİB-dən bildirilib ki, Bərdədə baş verən yol-nəqliyyat hadisəsi ilə əlaqədar 2000-ci il təvəllüdlü şəxs (kişi cinsli) 03.10.2025-ci il tarixində saat 15:40 radələrində Bərdə Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

Sağ bud sümüyünün burmaaltı çoxqəlpəli yerdəyişmiş sınığı, sağ göz altının əzilmiş cırılmış yarası diaqnozları təyin edilən şəxsin müalicəsi davam etdirilir, vəziyyəti ağırdır.