“Azərsu”yun sədr müavininin düşdüyü qəza ilə bağlı - RƏSMİ AÇIQLAMA+FOTO

Daxili İşlər Nazirliyi dünən Sumqayıt şəhərində “Azərsu” ASC-nin sədr müavini Teyyub Cabbarovun düşdüyü qəza ilə bağlı açıqlama verib. Avtosfer.az xəbər verir ki, mayın 2-də saat 15 radələrində Sumqayıt şəhərinin Z.Tağıyev qəsəbəsində Bakı şəhər sakini Rüstəm Haqverdiyevin idarə etdiyi “Toyota” və Qusar rayon sakini Rabit Əkbərovun idarə etdiyi “QAZ-3110” markalı avtomobillər toqquşub. “QAZ-3110” markalı avtomobildə yanğın baş verib. Nəticədə R.Haqverdiyevin sərnişinlərindən Adışirin Ələkbərov hadisə yerində ölüb, özü və 3 sərnişini, habelə R.Əkbərov xəstəxanaya yerləşdirilib, R.Haqverdiyev orada vəfat edib. Sumqayıt ŞPİ tərəfindən araşdırma aparılır.

Qeyd edək ki, qəzaya düşən sərnişinlərdən biri Teyyub Cabbarov “Toyota” markalı avtomobildə olub, o yüngül xəsarət alıb. Vəfat edən Adışirin Ələkbərov “Azərsu”nun “Sukanal” Elmi Tədqiqat və Layihə İnstitutunun elmi işlər üzrə direktor müavini olub. Hadisə şahidləri “Qafqazinfo”ya dünənki dəhşətli qəzadan daha bir foto göndərib.