Bakı-Quba yolunda qəza - 3 yaralı

Bakı-Quba-Rusiya Federasiyası magistral yolunun 110-cu kilometrliyində yol qəzası baş verib. Avtosfer.az-ın anspress-ə istinadən məlumatına görə, hadisə yolun Siyəzən rayonundan keçən hissəsində qeydə alınıb. Siyəzən rayon sakini 1989-cu il təvəllüdlü Mais Sədrəddinov idarə etdiyi 53- BB- 437 dövlət nömrə nişanlı “Opel” markalı avtomobili ilə Quba istiqamətində hərəkətdə olarkən adı hələlik istintaqla müəyyən edilməyən sürücünün idarə etdiyi 10- SO- 099 dövlət nömrə nişanlı “Toyota” markalı avtomobillə toqquşub. Qəza nəticəsində 3 nəfər - Bakı şəhər sakini 1957-ci il təvəllüdlü Azər Qəribov, Siyəzən rayon sakinləri 1991-ci il təvəllüdlü Elvin Nəcəfov və Mais Sədrəddinov müxtəlif dərəcəli bədən xəsarətləri ilə Siyəzən Regional Müalicə Diaqnostika Mərkəzinə yerləşdiriliblər. Xəsarət alanlardan iki nəfər ilkin tibbi yardım göstərildikdən sonra evə buraxılsa da 25 yaşlı Elvin Nəcəfovun vəziyyəti ağırdır. Hazırda onun müalicəsi üçün Bakıdan həkimlər çağırılıb.

Faktla bağlı Baş Dövlət Yol Polisi İdarəsində araşdırma aparılır.