Bakıda avtobus qəzası - Maşın sərnişin dolu avtobusu yol kənarına sıxışdırdı

Şüvəlan ərazisində yol-qəza hadisəsi qeydə alınıb. Avtosfer.az cebhe.info-ya istinadən xəbər verir ki, 90-VX-137 dövlət nömrə nişanlı 136 nömrəli avtobus Şüvəlan ərazisində qəzaya uğrayıb. Şahidlərin sözlərinə görə, yaxınlıqdakı nəqliyyat vasitəsi avtobusu yol kənarına sıxışdırıb, nəticədə qəza baş verib. Bakı Nəqliyyat Agentliyinin İctimaiyyətlə əlaqələr və maarifləndirmə şöbəsinin sektor müdiri Mais Ağayev qəzada xəsarət alanların olmadığını, avtobusun isə hazırda yenidən xəttə buraxıldığını bildirib: “Səhər saatlarında 136 nömrəli avtobus Şüvəlan ərazisində qəzaya uğrayıb. Biz daşıyıcı ilə dərhal əlaqə saxladıq. Onlar da qəza faktını təsdiq etsələr də xəsarət alanların olmadığını bildirdilər. Digər nəqliyyat vasitəsi avtobusu sıxışdırıb, nəticədə avtobus yoldan çıxıb. Sərnişinlər xəsarət almayıb və hazırda avtobus yenidən baxışdan sonra xəttə buraxılıb”.