Bakıda "BakuBus" ağaca ÇIRPILDI - VİDEO - YENİLƏNİB

"BakuBus"ın 10 nömrəli marşrut xəttindəki avtobusun ağaca çırpılmasına səbəb ehtiyatsızlıq olub".

Bunu açıqlamasında "BakuBus" MMC-nin mətbuat katibi Əsmər Əliyeva deyib.

O bildirib ki, ilkin məlumata görə, hadisə nəticəsində avtobusda olan 3 sərnişin yüngül xəsarət alıb: 

"Bu gün saat 7:10-da "BakuBus" MMC-nin balansında olan 10 nömrəli marşrut xətti üzrə hərəkət edən 77-JA-658 dövlət qeydiyyat nişanlı avtobus Nazim Hikmət küçəsi, 73 ünvanında (Mirəli Seyidov küçəsi ilə kəsişmədə) hərəkətdə olarkən yol kənarındakı ağaca çırpılıb. Nəticədə ağac qırılaraq dayanacaqda dayanan 90-TE-377 dövlət qeydiyyat nişanlı avtomobilin üzərinə aşıb.

İlkin məlumata əsasən, nəqliyyat vasitəsinin sürücüsü Şəhriyar Məcidzadə ehtiyatsızlıq səbəbindən idarəetməni itirib və nəticədə avtobus yoldan çıxaraq ağaca çırpılıb. Hadisə nəticəsində avtobusda olan 3 sərnişin yüngül xəsarət alıb və dərhal təcili tibbi yardım avtomobilinin vasitəsilə 1 saylı Klinik Xəstəxanaya aparılaraq ilkin tibbi müdaxilə edilib, hazırda onların vəziyyəti normaldır.

Hadisə ilə bağlı aidiyyəti qurumlara məlumat verilib və hazırda araşdırma aparılır".(oxu.az)

***09:47
Bakı şəhəri, Yasamal rayonunda yol-nəqliyyat hadisəsi baş verib.

Avtosfer.az oxu.az-a istinadən xəbər verir ki, Yasamal rayonu, Mirəli Seyidov küçəsi ilə Qəzənfər Musabəyov parkının yaxınlığından keçərkən "BakuBus" MMC-yə məxsus 10 nömrəli marşrut xəttinin avtobusu ağaca çırpılıb.

Sözügedən hadisə nəticəsində ağacın qarşısında duran avtomobilə zərər dəyib.

Hadisə yerindən görüntüləri təqdim edirik: