Bakıda iki "Shagman" toqquşdu, geriyə bu mənzərə qaldı – FOTOLAR

Bakıda iki yük maşınının toqquşması ilə nəticələnən qəza baş verib. Avtosfer.az-ın APA-ya istinadən məlumatına görə, hadisə  Zığ şosesi ilə Gəncə prospektinin kəsişməsində qeydə alınıb.  Belə ki, 1992-ci il təvəllüdlü Əsədov Amil Ramiz oğlunun idarə etdiyi "Shagman" yüklü halda Zığ şosesi ilə üzü şəhər istiqamətində hərəkətdə olarkən qəfil qarşısına Gəncə prospektindən Zığ şosesinə dönən digər bir "Shagman" çıxıb.  Toqquşan hər iki yük maşını aşıb. Qəza nəticəsində sürücü Amil Əsədov və yanındakı sərnişini Bəhruz adlı şəxs yaralanıblar.

İkinci yük maşınının kabinəsinə sıxılmış vəziyyətdə qaldığından əraziyə Fövqəladə Hallar Nazirliyinin (FHN) Xüsusi Riskli Xilasetmə Xidmətinin əməkdaşları çağırılıb. Eyni zamanda hadisə yerinə iki təcili yardım və Xətai Rayon Polis İdarəsinin əməkdaşları cəlb olunub. Sürücü kabinəsində sıxılmış vəziyyətdə qalan Bəhruz adlı şəxs xüsusi alət və avadanlıqların köməyi ilə xilasedicilər tərəfindən çıxarılıb təcili yardım briqadasına təhvil verilib.

Təcili yardımda ilkin tibbi yardım alan sürücü Amil Əsədovun sözlərinə görə, idarə etdiyi "Shagman" yüklü olub. Təkərlərdən biri partladığından əyləci nə qədər bassa da toqquşmadan qaça bilməyib.

Faktla bağlı Xətai Rayon Polis İdarəsində araşdırma aparılır. Hadisə ilə bağlı avtotexniki ekspertiza təyin olunub. Qəzanın əsl səbəbi də yalnız ekspertizanın rəyindən sonra məlum olacaq.