Bakıda piyada avtobusun altında qalaraq öldü

Binəqədi rayonunda avtobus yolu keçmək istəyən piyadanı vurub. Avtosfer.az-ın musavat.com-a istinadən məlumatına görə, hadisə mayın 18-də, saat 18:00 radələrində Binəqədi şossesində baş verib. 155 nömrəli marşrut xətti ilə hərəkət edən “Daewoo” markalı avtobus yolu keçmək istəyən 50-55 yaşlı kişini vurub. Avtobusun altında qalan piyada hadisə yerindəcə keçinib. Avtobusun sürücüsü saxlanılıb. Ölən piyadanın kimliyi isə hələ ki, məlum olmayıb. Hadisə ilə bağlı Binəqədi Rayon Polis İdarəsində araşdırma aparılır.