Bələdiyyə sədri yol qəzası zamanı ağır yaralanıb

Daşkəsəndə iki nəfərin xəsarət alması ilə nəticələnən yol-nəqliyyat hadisəsi baş verib. Avtosfer.az bildirir ki, Gəncə-Daşkəsən avtomobil yolunun rayonun Bayan kəndi ərazisindən keçən hissəsində "Niva" və "QAZ-24" markalı avtomobillər toqquşub. Nəticədə iki nəfər - Daşkəsən rayon Quşçu kənd sakini Sabir Camalov və Zəylik kənd sakini Akif Muradov müxtəlif bədən xəsarətləri alaraq Gəncə Şəhər Təcili Tibbi Yardım Xəstəxanasına yerləşdiriliblər. Xəstəxanadan verilən məlumata görə, A.Muradov kəllə-beyin travması, S.Camalov isə döş qəfəsinin sınığı xəsarəti alıb, hər iki yaralının vəziyyəti ağırdır.

Faktla bağlı Daşkəsən rayon Polis Şöbəsində araşdırma aparılır.

Qeyd edək ki, "Niva"-nın sürücüsü A.Muradov Daşkəsən rayonunun Zəylik kənd bələdiyyəsinin sədridir.