“Boksol yolu”nda qarşıdan gələn maşınları vecinə almayıb qəza törətdi - VİDEO

Paytaxtın Binəqədi rayonunda qayda pozan yük maşını sürücüsü qəza törədib.

Avtosfer.az-ın məlumatına görə, hadisə bir müddət əvvəl səhər saatlarında “Boksol yolu”nda qeydə alınıb.

Belə ki, 77-EU-763 dövlət nömrə nişanlı “Ford Transit” markalı yük maşınının sürücüsü qarşısında hərəkət edən avtomobili ötmək üçün əks istiqamətli hərəkət zolağına çıxıb. Videodan görünür ki, sürücü qarşıdan gələn nəqliyyat vasitələrinə baxmayaraq, ötmə manevrini davam etdirib. Nəticədə yük maşını qarşıdan gələn “Hyundai” markalı və ötmək istədiyi "KIA" markalı avtomobillə toqquşub.

Qəza nəticəsində nəqliyyat vasitələrinə maddi ziyan dəyib. Görüntülərdən yük maşını sürücüsünün bütöv xəttin tələbini pozaraq əks istiqamətli yola çıxdığı da aydın görünür.

Xatırladaq ki, ötmə manevri yalnız bunun təhlükəsiz olduğuna əmin olduqda və yol hərəkəti qaydalarının tələblərinə uyğun şəkildə həyata keçirilə bilər. Bütöv və qoşa bütöv xətlərin tələblərini pozaraq əks istiqamətli hərəkət zolağına çıxmaq isə qadağandır.

Nərmin