“Fiat” kartof yüklü TIR-a arxadan çırpıldı – 5 ölü, 1 ağır yaralı - VİDEO

Türkiyədə iki nəqliyyat vasitəsinin iştirakı ilə ağır yol qəzası baş verib. Avtosfer.az yerli mediaya istinadən xəbər verir ki, hadisə Mersin-Tarsus-Adana-Pozantı avtomobil yolunun Damlama ərazisində keçən hissəsində qeydə alınıb.

Məlumata görə, 27-BTB-95 dövlət qeydiyyat nişanlı “Fiat” markalı avtomobil, 63-ACP-670 dövlət qeydiyyat nişanlı kartof yüklü TIR-a arxadan çırpılıb. Zərbənin təsirindən avtomobilin ön hissəsi yük maşınının altın girərək deformasiyaya uğrayıb.

Ətrafdakı sürücülərin xəbər verməsindən sonra hadisə yerinə xilasetmə, polis və təcili tibbi yardım briqadasının əməkdaşları gəlib.

Qəza nəticəsində 5 nəfər ölüb, 1 nəfər isə ağır xəsarətlər alıb. Yaralı təcili tibbi yardım maşını ilə xəstəxanaya aparılıb.

Faktla bağlı araşdırma aparılır.

Namiq Musayev