İki avtomobil toqquşdu: 2 ölü, 1 yaralı - Masallıda

Masallıda ağır yol-nəqliyyat qəzası baş verib.  Avtosfer.az apa-ya istinadən xəbər verir ki, hadisə bu gün saat 12.00 radələrində Masallı-Yardımlı şosesinin rayonunun Qəriblər kəndi ərazisindən keçən hissəsində qeydə alınıb. Sürücülərinin şəxsiyyəti hələlik məlum olmayan “Fiat” markalı və “VAZ-2107” markalı minik avtomobilləri toqquşub. Güclü zərbədən hər iki nəqlkiyyat vasitəsinə ciddi ziyan dəyib, həmçinin “VAZ-2107”-nin sərnişini olan ər və arvad aldıqları çoxsaylı bədən xəsarətlərindən hadisə yerində dünyasını dəyişib. Onların meyitləri morqa aparılıb. Müxtəlif dərəcəli bədən xəsarətləri almış “Fiat”ın sərnişini, 2004-cü il təvəllüdlü Zeynəb Həmzəyeva isə Masallı Mərkəzi Rayon Xəstəxanasına yerləşdirilib.

Faktla bağlı araşdırmalara başlanılıb.