İki maşın toqquşdu: 3 nəfər xəsarət alıb - Bakı-Qazax yolunda

Bakı-Qazax yolunun Yevlax şəhərinə yaxın hissəsində 3 nəfərin xəsarət alması ilə nəticələnən avtomobil qəzası baş verib. Avtosfer.az “Report”a istinadən xəbər verir ki, qəza zamanı "Jiquli" və hazırda markası məlum olmayan başqa bir maşın toqquşub. Digər maşının sürücüsünün qadın olduğu bildirilir. Nəticədə "Jiquli"də olan 3 nəfər - 1950-ci il təvəllüdlü Masallı rayon sakini Novruzov Valeh Mikayıl oğlu, həmçinin Cəlilabad rayon sakinləri - 1960-cı il təvəllüdlü Nəcəfov Zabit Camal oğlu və 1960-ci il təvəllüdlü Nağıyev İlham Həsən oğlu xəsarət alıb. Yaralılar Mingəçevir Şəhər Mərkəzi Xəstəxanasına çatdırılıb. Onlara tibbi yardım göstərildikdən sonra vəziyyətləri sabitləşib. Baş vermiş hadisə ilə bağlı Baş Dövlət Yol Polisi İdarəsi araşdırma aparır.