Lənkəranda sərxoş piyadanı maşın vurub - FOTO

Lənkəranda piyadanın vurulması ilə nəticələnən yol qəzası baş verib. "Report"un Cənub bürosunun verdiyi xəbərə görə, hadisə Ələt-Astara magistralının 201-km-də, yolun Lənkəran rayonunun Şilavar kəndindən keçən hissəsində qeydə alınıb. Lənkəran şəhər sakini, 40 yaşlı Məmmədov Zaur Mais oğlu idarə etdiyi "Nissan Sunny" markalı "42-BO-606" dövlət qeydiyyat nişanlı minik avtomaşını ilə yolu keçməkdə olan piyada, Aşağı Nüvədi qəsəbə sakini, 59 yaşlı Bağırov Akif Əsgər oğlunu vurub. Sürücü dərhal yaralını Lənkəran Rayon Mərkəzi Xəstəxanasına çatdırıb. Müxtəlif dərəcəli bədən xəsarətləri və sağ ayağının sınığı diaqnozu qoyulan A.Bağırov Travmatologiya şöbəsinə yerləşdirilib. Piyadanın sərxoş halda olduğu deyilir.

Faktla bağlı Baş Dövlət Yol Polisi İdarəsi əməkdaşları tərəfindən araşdırma aparılır.