Masallıda yük və minik maşınları toqquşdu: 5 yaralı

Masallıda 6 nəfərin xəsarət alması ilə nəticələnən ağır yol-nəqliyyat qəzası baş verib. Avtosfer.az apa-ya istinadən xəbər verir ki, hadisə Göytəpə-Həsənli yolunda qeydə alınıb. Sürücülərinin şəxsiyyəti hələlik məlum olmayan “QazEL” markalı yük maşını ilə “VAZ-21015” markalı minik avtomobili toqquşub. Güclü zərbədən “QazEL” çevrilib. Maşının yüngül xəsarət almış sürücüsünə hadisə yerinə çağırılmış təcili tibbi yardım briqadası tərəfindən yardım göstərilib. Qəza zamanı müxtəlif dərəcəli bədən xəsarətləri almış “VAZ-21015”-in sərnişinləri olan Masallı rayonunun Həsənli kənd sakinləri, 1956-cı il təvəllüdlü Vyaçeslav Mikayılov, onun qızı, 1976-cı il təvəllüdlü Dürrə Mikayılova, 1982-ci il təvəllüdlü Mərdan İsgəndərov, 2010-cu il təvəllüdlü Mahmud İsgəndərov Masallı Mərkəzi Rayon Xəstəxanasına yerləşdiriliblər.

“VAZ-21015”-in sürücüsünün də xəsarət aldığı və Cəlilabad Mərkəzi Rayon Xəstəxanasına yerləşdirildiyi bildirilir.

Faktla bağlı araşdırma aparılır.