Metroda qatarda tüstüləmə baş verdi – 8 yaralı

ABŞ-ın Boston şəhərində metronun sərnişinləri tüstülənən qatardan çıxmaq üçün vaqonların pəncərələrini sındırmalı olublar. Hadisə nəticəsində bir neçə nəfər xəsarət alıb. Avtosfer.az azərtac-a istinadən xəbər verir ki, insident oktyabrın 26-da axşam saatlarında şəhər metrosunun “narıncı xəttində” (Orange line) baş verib. Sərnişinlər “Back Bay” stansiyasından yola düşən lokomotivdə güclü tüstülənmə müşahidə ediblər. Maşinist qatarı dayandırsa da, qapılar açılmayıb. Nəticədə sərnişinlər pəncərələri qıraraq xilas olmağa çalışıblar.

Tüstüdən zəhərlənən 5 sərnişinə yerində tibbi yardım göstərilib, 3 nəfər xəstəxanaya aparılıb.

Hadisədən sonra xətdə qatarların hərəkəti dayandırılıb. Massaçusets ştatının nəqliyyat idarəsindən verilən məlumata görə, tüstülənmə mühərrikin həddən artıq qızması səbəbindən baş verib.