Ölümlə nəticələnən yol qəzası baş verib - Ucarda

Ucarda ölümlə nəticələnən yol-nəqliyyat hadisəsi baş verib. Avtosfer.az xəbər verir ki, bu barədə apa-nın yerli bürosunun xəbərinə görə, hadisə bu gün günorta saatlarında Bakı-Qazax yolunun Ucar rayonundan keçən hissəsində qeydə alınıb.

Gəncə şəhər sakini, 56 yaşlı Tağı Əli oğlu Haqverdiyev idarə etdiyi "Mercedes" markalı minik maşını ilə yolu keçən piyada, Ucar rayon Qazyan kənd sakini, 65 yaşlı Esmira Musa qızı Məmmədovanı vurub. Ağır xəsarət alan piyada hadisə yerində dünyasını dəyişib.

Hadisə şahidlərinin dediyinə görə, adıçəkilən ərazidə analoji hadisələr tez-tez baş verir. Buna əsas səbəb yolda yeraltı və yaxud yerüstü keçidin olmamasıdır.

Faktla bağlı Baş Dövlət Yol Polisinin İstintaq və Təhqiqat şöbəsində araşdırma aparılır.