Piyadanı vurub hadisə yerindən qaçan sürücü saxlanılıb

Noyabrın 8-də saat 4.00 radələrində Qaradağ rayonunun Qızıldaş qəsəbəsindən sərxoş vəziyyətdə olan Şamaxı rayon sakini Sovqat Məmmədovun kəllə-beyin xəsarəti ilə və ayağı sınmış vəziyyətdə xəstəxanaya gətirilməsi barədə 38-ci polis bölməsinə məlumat daxil olub. Daxili İşlər Nazirliyinin (DİN) mətbuat xidmətindən Avtosfer.az-a bildiriblər ki, polis əməkdaşları tərəfindən aparılan araşdırmalarla həmin şəxsin yol-nəqliyyat hadisəsi nəticəsində ağır bədən xəsarəti aldığı məlum olub. DİN-in Təhlükəsiz Şəhər Xidməti ilə birgə keçirilmiş tədbirləri nəticəsində hadisənin “Mercedes” markalı avtomobillə törədilməsi müəyyən edilib. Əməliyyat-axtarış tədbirləri nəticəsində həmin avtomobilin sürücüsü - Bakı şəhər sakini Eldar Eldarov polis əməkdaşları tərəfindən saxlanılaraq istintaqa təhvil verilib.