Prospektdə “BakuBus” avtobusu ilə taksi toqquşdu, sərnişinlər düşürüldü - VİDEO

Paytaxtda “BakuBus” MMC-yə məxsus avtobus və taksi minik avtomobilinin iştirakı ilə qəza baş verib.

Avtosfer.az xəbər verir ki, Bakının Yasamal rayonu İnşaatçılar prospektində 99-JU-718 nömrə nişanlı “BakuBus” avtobusu ilə “Nissan” markalı 99-OE-952 qeydiyyat nişanlı taksi maşını toqquşub. Hadisə nəticəsində taksi avtomobilinə ziyan dəyib, avtobusun isə ön sağ tərəfində yüngül zərər var. Qəza zamanı xəsarət alan olmayıb. Hadisə baş verərkən sərnişinlər avtobusdan düşürülüb.

Sərnişinlərin dediklərinə görə, yolun kənarında saxlayan taksi maşını dayanacaqdan hərəkət edən 3 nömrəli marşrut avtobusun önünə qəfil manevr edib. Avtobusu idarə edən şəxs nə qədər qəzadan yayınmağa çalışsa da, hadisə qaçılmaz olub.

Şahidlər bildirir ki, “Nisanın” sürücüsü həm də əlildir, sol ayağında problem var və o yeriyərkən axsayırmış. Baş verən qəza nəticəsində prospektdə uzunmüddət sıxlıq yaranıb. Daha sonra hər iki nəqliyyat vasitəsi yolun kənarına çəkilib.

Qeyd edək ki, bu gün artıq 2-ci dəfə İnşaatçılar prospektində qəza baş verir.

Səfər