Şamaxıda 4 yaşlı uşağı avtomobil vurub

Şamaxı rayonunda azyaşlı uşağın vurulması ilə nəticələnən yol-nəqliyyat hadisəsi baş verib. Avtosfer.az-ın APA-ya istinadən xəbərinə görə, hadisə ötən gecə saat 22:30 radələrində Şamaxı şəhərinin Nazim Hikmət küçəsində qeydə alınıb. Həmin ərazidə yaşayan 2013-cü il təvəllüdlü Etibarlı Hüseyn Nemət oğlu valideyn nəzarətindən yayınaraq küçəyə çıxıb və yolda hərəkət edən “VAZ 2107” markalı minik avtomobili onu vurub. Ağır bədən xəsarətləri alan azyaşlı uşaq Şamaxı rayon Mərkəzi Xəstəxanasına çatdırılıb. Ona tibbi yardım göstərilib, lakin vəziyyəti ağır olduğu üçün uşaq Bakıdakı 1 saylı Şəhər Klinik Xəstəxanasına göndərilib.

Faktla bağlı Şamaxı Rayon Polis Şöbəsi tərəfindən araşdırma aparılır.