Sulutəpə dairəsində qəza: Yük maşını aşıb avtobusa çırpıldı - VİDEO

Paytaxtın Binəqədi rayonu, Sulutəpə dairəsində yol-nəqliyyat hadisəsi baş verib.

Avtosfer.az-ın məlumatına görə, qəza bir neçə gün əvvəl səhər saatlarında qeydə alınıb. Belə ki, 77-OJ-850 dövlət nömrə nişanlı “Mercedes” markalı yük avtomobili idarəetməni itirərək aşıb və 506 nömrəli marşrut xətti üzrə hərəkət edən avtobusla toqquşub.

Şahidlərin bildirdiyinə əsasən, hadisəyə səbəb yük maşınının dairəyə yüksək sürətlə daxil olması olub.

Qəza nəticəsində ciddi xəsarət alan olmasa da, hər iki nəqliyyat vasitəsinə maddi ziyan dəyib.

Əraziyə polis əməkdaşları cəlb olunub, faktla bağlı araşdırma aparılır.

Nərmin