Təmir zamanı ustanın başına avtomobil diski düşüb - Göygöldə

Göygöl rayonunda təmir zamanı avtomobil ustasının başına maşın diski düşərək ağır yaralanıb. Avtosfer.az "Report"a istinadən xəbər verir ki, ağır yaralanan ustanı Bakıdakı xəstəxanaların birinə aparılması gözlənilir.

Gəncə şəhər Təcili Tibbi Yardım Xəstəxanasından "Report"a bildirilib ki, rayonun Xaqani kənd sakini, 1984-cü il təvəllüdlü İlham Həsənov ağır kəllə-beyin travması diaqnozu ilə xəstəxanaya gətirilib: "Yaralıya həkimlər tərəfindən tibbi xidmət göstərilib və onun vəziyyəti ağır olaraq qalır. Günün ikinci yarısından sonra vəziyyətində yaxşılığa doğru irəliləyiş olmasa, Bakıda yerləşən xəstəxanalardan birinə göndəriləcək".

Yaxınlarının bildirdiklərinə görə, İ.Həsənov avtomobil ustasıdı və həyətlərində "Qazel" markalı avtomaşını təmir edərkən ehtiyatsız davranıb və avtomobilin diski onun başına düşüb.

Faktla bağlı Göygöl Rayon Polis Şöbəsindən (RPŞ) araşdırma aparılır.