Tıxacda böyük qəza: 17 yaralı

Taylandda idarəetməni itirən yük maşınının tıxacda dayanan avtomobillərə çırpılması nəticəsində 17 nəfər xəsarət alıb.

Avtosfer.az cebhe.info-ya istinadən xəbər verir ki, Taylandın paytaxtı Banqkok şəhərindəki əsas Kançanapisek şossesində dünən axşam saatlarında baş verən qəzada idarəetməni itirən yük maşını tıxacda dayanan avtomobillərə çırpılıb.

Ümumilikdə 16 avtomobilin zədələndiyi qəzada vəziyyəti ağır olanlar da daxil olmaqla 17 nəfər yaralanıb.

Yaralılar ətraf xəstəxanalara çatdırılıb.

Kamera görüntülərindən  yük maşınının əvvəlcə hərəkətdə olan digər avtomobilləri vurduğu, daha sonra yan yola manevr edərək dayanmağı bacardığı görünür.

Qəzadan sonra zədələnən 16 nəqliyyat vasitəsi və yük maşını magistral yolun uzun müddət bağlanmasına və kilometrlərlə tıxaca səbəb olub.

Hadisə ilə bağlı araşdırmalara başlanılıb.