Ukraynanın MiQ-29 qırıcısı qəzaya uğrayıb

İyunun 27-nə keçən gecə Ukrayna Müdafiə Qüvvələri MiQ-29 qırıcı təyyarəsi ilə əlaqəni itirib.

Avtosfer.az APA-ya istinadən xəbər verir ki, bu barədə Ukrayna Hərbi Hava Qüvvələri məlumat yayıb.

Bildirilib ki, pilot döyüş tapşırığını Poltava vilayətinin səmasında yerinə yetirərkən təyyarə ilə əlaqə kəsilib. Hazırda təyyarənin qəzaya uğramasının səbəbləri və hadisənin başvermə şəraiti araşdırılır.

"Biz təyyarənin itirildiyini təsdiqləyirik. Lakin ukraynalı pilot uğurla katapult edib, axtarış-xilasetmə qrupu ilə əlaqə saxlayıb və operativ şəkildə müayinə və zəruri tibbi yardım göstərilməsi üçün tibb müəssisəsinə çatdırılıb", - deyə Hərbi Hava Qüvvələrinin açıqlamasında bildirilib.