Xəzərdə ağır qəza: Avtobus dayanmış yük maşınına çırpıldı - VİDEO - YENİLƏNİB

Bu gün səhər saatlarında qəzaya düşən 107 nömrəli marşrut xətti üzrə fəaliyyət göstərən avtobus "Çinar Trans" MMC şirkətinə məxsus olub.

Avtosfer.az-ın məlumatına görə, Oxu.Az-a açıqlama verən sözügedən şirkətin direktoru İsmayıl Hüseynov bildirib ki, hadisə bu gün avtobusun hələ marşruta çıxmadığı vaxtda baş verib.

"Hadisə xətdənkənar vaxtda, sürücünün qarajdan çıxıb işə getdiyi zaman baş verib. Sürücü yolun sağında dayanan yük maşınınını görməyib, görəndə isə artıq gec olub. Bu, 107 nömrəli xətt üzrə hərəkət edən avtobusdur. Hadisə vaxtı avtobusda sürücüdən başqa heç kim olmayıb. Xəsarət alan yoxdur. Yalnız avtobusa maddi ziyan dəyib. Hadisədən sonra sürücü avtobusu özü idarə edərək qaraja gətirib. Avtobuslarda mühərrik arxa hissədə yerləşdiyi üçün texniki baxımdan ciddi problem yaranmayıb. Yalnız avtobusun üst hissəsi və ön şüşəsi zədələnib", - deyə İ.Hüseynov bildirib.

***11:36

Bakıda sərnişin avtobusunun yük maşınına çırpılması ilə nəticələnən yol-nəqliyyat hadisəsinin bəzi detalları məlum olub.

Avtosfer.az xəbər verir ki, hadisə bu gün saat 05:10-da qeydə alınıb.

Hidayət Seyidmiri oğlu Fəttahovun idarə etdiyi "Iveco" markalı, 99-JX-260 dövlət nömrə nişanlı sərnişin avtobusu MAN markalı yük avtomobilinin qoşqusuna çırpılıb. Hadisə nəticəsində xəsarət alan olmayıb./oxu.az

***09:39

Bu gün səhər saatlarında Bakı şəhərinin Xəzər rayonu ərazisində marşrut avtobusu qəzaya uğrayıb.

Avtosfer.az-ın əldə etdiyi məlumata görə, “Çinar Trans” MMC-yə məxsus olan “İveco” markalı iritutumlu avtobus yolun kənarında dayanmış yük avtomobilinə çırpılıb.

Nəticədə avtobus tamamilə yararsız hala düşüb. Xoşbəxtlikdən hadisə vaxtı avtobusda sərnişin olmayıb.

Könül Rauf